ఉక్రెయిన్‌ చేసిన భారీ డ్రోన్ల దాడిని విఫలం చేశామని రష్యా పేర్కొంది. తమ సరిహద్దు ప్రాంతాలకు కీవ్‌ పంపిన 31 డ్రోన్లను.. తమ గగనతల రక్షణ వ్యవస్థ నేలకూల్చిందని తెలిపింది. యుద్ధం ప్రారంభమైన తర్వాత తమ సరిహద్దులపై ఉక్రెయిన్‌ చేసిన అతి పెద్ద దాడి ఇదేనని చెప్పింది. మరోవైపు ఫ్రాన్స్‌కు పారిపోయిన రష్యా పాత్రికేయురాలు మరీనా ఒవస్యానికోవాకు మాస్కో న్యాయస్థానం బుధవారం ఎనిమిదిన్నరేళ్ల జైలు శిక్ష విధించింది. రష్యా అధికారిక ఛానల్‌ వన్‌లో పనిచేసిన మరీనా.. ఉక్రెయిన్‌పై పుతిన్‌ చేపట్టిన సైనిక చర్యకు వ్యతిరేకంగా లైవ్‌ టీవీలోనే ప్లకార్డు చూపించి సంచలనం సృష్టించారు. పుతిన్‌కు వ్యతిరేకంగా జరిగిన ర్యాలీల్లోనూ పాల్గొన్నారు.