కథానాయకుడు రజనీకాంత్‌ – దర్శకుడు లోకేశ్‌ కనగరాజ్‌ల కలయికలో ఓ చిత్రం రూపొందనున్న సంగతి తెలిసిందే. సన్‌పిక్చర్స్‌ పతాకంపై కళానిధి మారన్‌ నిర్మిస్తున్నారు. ఈ చిత్ర టైటిల్‌ను ఈనెల 22న ప్రకటించనున్నట్లు నిర్మాతలు ఇటీవల వెల్లడించారు. కాగా, ఇప్పుడా పేరుకు సంబంధించి ఓ ఆసక్తికర విషయం బయటకొచ్చింది. ఈ సినిమా కోసం ‘కళుగు’ అనే పేరు పరిశీలనలో ఉన్నట్లు సమాచారం. దీనికి తెలుగులో డేగ అని అర్థం. రజనీ పాత్ర తీరు తెన్నుల్ని దృష్టిలో పెట్టుకుని చిత్ర బృందం ఈ పేరునే ఖరారు చేయాలని ఆలోచన చేస్తున్నట్లు తెలుస్తోంది. ఈ సినిమాలో రజనీకాంత్‌ బంగారు స్మగ్లర్‌గా మునుపెన్నడూ చూడని క్యారెక్టరైజేషన్‌తో కనిపించనున్నట్లు వార్తలు వినిపిస్తున్నాయి. ఆయన పాత్రలో ప్రతినాయక ఛాయలు ఉంటాయని తెలిసింది. టైటిల్‌ ప్రకటన రోజే ఈ సినిమాకి సంబంధించిన నటీనటుల వివరాల్ని వెల్లడించనున్నారని టాక్‌. ఈ చిత్రానికి అనిరుధ్‌ సంగీత దర్శకుడిగా వ్యవహరిస్తున్నారు.