‘కేజీఎఫ్‌’ (KGF) సినిమాలతో యశ్‌ పేరు ఓ బ్రాండ్‌గా మారింది. భాషతో సంబంధం లేకుండా అభిమానులను సొంతం చేసుకున్నాడీ హీరో. కేజీఎఫ్‌ తర్వాత చేపట్టబోయే ప్రాజెక్ట్‌కు సంబంధించి యశ్‌ ఇప్పటి వరకు ఎలాంటి ప్రకటన చేయలేదు. ఎప్పటికప్పుడు ‘వేచిఉండండి.. క్రేజీ అప్‌డేట్ ఇస్తాను’ అని అభిమానులకు చెబుతున్నారు. ఈ నేపథ్యంలో.. తాజాగా ఆయనకు సంబంధించిన ఓ ఫొటో సోషల్‌ మీడియాలో ట్రెండ్‌ అవుతోంది.

హాలీవుడ్‌ దర్శకుడు జేజేపెర్రీతో యశ్‌ దిగిన ఫొటో ప్రస్తుతం నెట్టింట సందడి చేస్తోంది. దీంతో కొన్ని రోజులుగా ఆయన తర్వాత సినిమాపై (#Yash19) వస్తోన్న ఊహాగానాలకు బలం చేకూరింది. ఈ కేజీఎఫ్‌ స్టార్‌ తన తర్వాతి సినిమా కోసం హాలీవుడ్‌ స్టంట్‌ డైరెక్టర్‌ దగ్గర మార్షల్‌ ఆర్ట్స్‌లో శిక్షణ తీసుకుంటున్నాడని ఈ ఏడాది ప్రారంభం నుంచి వార్తలు వస్తున్నాయి. జేజే పెర్రీ ‘అవతార్‌’తో పాటు పలు హాలీవుడ్‌ సినిమాలకు పనిచేశారు. దీంతో యశ్‌ రానున్న సినిమా కూడా ఆ స్థాయిలో ఉండనుందని అభిమానులు భావిస్తున్నారు. సైంటిఫిక్‌ యాక్షన్‌ థ్రిల్లర్‌గా ఇది రూపొందనుందని సమాచారం. ఇందులో యశ్‌ భిన్నమైన లుక్‌లో కనిపించనున్నారని టాక్‌.