సిరియా (Syria)లోని ఇరాన్‌ (Iran) మద్దతున్న సాయుధ బలగాలపై అమెరికా (USA) రెండోసారి గగనతల దాడులు నిర్వహించింది. ఈ దాడుల్లో తొమ్మిది మంది మృతి చెందినట్లు సిరియన్‌ అబ్జర్వేటరీ ఫర్‌ హ్యుమన్‌ రైట్స్‌ చీఫ్‌ రమీ అబ్దెల్‌ రెహమాన్‌ వెల్లడించారు. ఇరాక్‌, సిరియాలోని అమెరికా సైనిక స్థావరాలపై ఇరాన్‌ మద్దతున్న సాయుధ బలగాలు గత కొన్ని రోజుల్లో 12 సార్లు దాడి చేశాయి. వాటికి ప్రతీకారంగానే అమెరికా ఈ దాడులు చేస్తోంది.

గాజాలో జరుగుతోన్న సంక్షోభానికి ఈ దాడులకు ఎలాంటి సంబంధం లేదని మొదటిసారి దాడి చేసినప్పుడే అమెరికా రక్షణ మంత్రి లాయిడ్‌ ఆస్టిన్‌ వెల్లడించారు. అమెరికా దళాలపై దాడులను ఏమాత్రం సహించబోమని తెలియజేసేందుకే ఈ చర్యను చేపట్టినట్లు చెప్పారు. అమెరికా దళాలపై జరుగుతున్న దాడుల వెనుక ఇరాన్‌ హస్తం ఉందని.. వాటిని చూస్తూ ఊరుకోబోమని హెచ్చరించారు.