కాంగ్రెస్‌ పార్టీ అగ్రనేత రాహుల్‌గాంధీ తన తల్లి సోనియాగాంధీకి ముద్దులొలికే బుజ్జి కుక్కపిల్లను బహుమతిగా ఇచ్చి ఆశ్చర్యపరిచారు. గత ఆగస్టు నెలలో గోవాలో పర్యటించిన రాహుల్‌ ‘జాక్‌ రస్సెల్‌ టెర్రియర్‌’ జాతికి చెందిన ఆడ కుక్కపిల్లను తనతోపాటు దిల్లీకి తీసుకువచ్చారు. కుక్కపిల్లను ఓ అట్టపెట్టెలో పెట్టి సోనియా ముందుంచి తెరవమని కోరారు. పెట్టెను తెరచిన వెంటనే ఆమె ముఖంలో ఎనలేని సంతోషం కనిపించింది. కుక్కపిల్లను అమాంతం ఎత్తుకొని, కుమారుడు రాహుల్‌ను ప్రేమగా హత్తుకున్నారు. ఈ కుక్కపిల్లకు ‘నూరీ’ అని పేరు పెట్టారు. గోవాలో సేకరణ మొదలు నూరీని సోనియాకు అందించేవరకు జరిగిన పరిణామాలతో ఓ వీడియో రూపొందించారు. ‘ప్రపంచ జంతు సంక్షేమ దినోత్సవం’ (అక్టోబరు 4) సందర్భంగా ఆ వీడియోను రాహుల్‌ బుధవారం తన యూట్యూబ్‌ ఛానల్‌లో షేర్‌ చేయగా.. అది వైరల్‌గా మారింది. ‘‘మా కుటుంబంలోకి కొత్త సభ్యురాలు వచ్చింది’’ అని రాహుల్‌ అన్నారు. సోనియా వద్ద ఇప్పటికే ‘లాపో’ అనే శునకం ఉండగా.. ఇపుడు నూరీ కూడా చేరింది.